පසුගිය 26 වෙනිදා රාත්‍රියේ සංවිධානාත්මක පිරිසක් අම්පාර නගරයේ හෝටලයකට සහ ආගමික ස්ථානයකට පරහදීමේ සිද්ධියත් සමඟ හටගත් නොසන්සුන්තාවය මුල්කොට මේ වන විට අම්පාර නගරයේ පොලිස් ආරක්ෂාව තර කොට තිබේ.
අම්පාර නගරයේ ඇතැම් හෝටල් වල ආහාර වලට 'වඳ පෙති' එක් කරන බවට කතා පැතිරීමත් සමඟ එම ආහාර පාර්සලයක තිබී දම් පැහැති පෙති කිහිපයක් හමුවී ඇතැයි යන පුවතක් මුල්කොට පසුගිය 26 වෙනිදා රාත්‍රියේ දෙසීයකටත් අධික පරිසක් පැමිණ අම්පාර නගරයේ භෝජන ශාලාවකට දේවස්ථානයකට සහ ඒ අවට තිබූ වාහන කිහිපයකට දැඩි හානි සිදුකොට තිබේ.
එහෙත් මේ සම්බන්ධ නිවේදනයක් නිකුත් කරන පාර්ලිමේන්තු මන්ත්‍රී දයා ගමගේ මහතා ප්‍රකාශකොට ඇත්තේ මෙය මෙරට සාමය, සංහිදියාව බිද දැමීම සඳහා දියත් කළ කුමන්ත්‍රණකාරී වැඩපිළිවෙලක් බවය.
මෙහිදී අදහස් දැක්වූ පාර්ලිමේන්තු මන්ත්‍රී මුජිබර් රහුමාන් මහතා ප්‍රකාශ කර ඇත්තේ මෙවර පළාත් පාලන මැතිවරණයේ ප්‍රතිඵල අනුව ඇතැම් අන්තවාදීන් වත්මන් රජය අස්ථාවර කිරීම පිණිස සැලසුම් සහගතව මෙම ක්‍රියාවන් සිදුකරන අතර අග්‍රාමාත්‍යවරයා නීතිය හා සාමය පිළිබඳ අමාත්‍ය ධූරය භාර ගැනීමත් සමඟ මෙම පිරිස් මෙවැනි කටයුතු වල නියැළීම පිළිබඳ විශේෂයෙන් සිතා බැලිය යුතු බවය.
එමෙන්ම මෙම ආහාර වලට 'වඳ පෙති' මුසු කරන්නේ නම් එය සූක්ෂම අයුරින් සිදු නොකොට මෙලෙස 'ප්‍රදර්ශනාත්මක ලෙසින්' සිදුකරන බවක් කෙසේ වත් පිළිගත නොහැකි බව මැදහත් පාර්ශව පෙන්වා දෙයි. මේ සම්බන්ධයෙන් ප්‍රජනක සෞඛ්‍යය පිළිබඳ විශේෂඥ වෛදවරුන් මීට පෙර අවස්ථා ගණනාවකදී පෙන්වා දී ඇත්තේ ස්ත්‍රීන් හෝ පුරුෂයන් වඳ භාවයට පත් කළ හැකි බෙහෙත් පෙත්තක් මෙ‍තෙක් ලෝකයේ නිපදවා නොමැති බවය.. ඒ කෙසේ හෝ පවුල් සෞඛ්‍ය නිලධාරිනියන්ට අල්ලස් දීමෙන් කාන්තාවන්ගේ වඳ භාවයට ඉවහල්වන ආහාර පාන සහ පෙති වර්ග බෙදා දෙන බවට මේ වන විට රට පුරා දූෂමාන ආරංචි පැතිරෙමින් පවතී.
මෙම සිදුවීම් වලට සම්බන්ධ පුද්ගලයන්ට එරෙහිව තරාතිරම නොබලා දැඩි සේ නීති ක්‍රියාත්මක කළ යුතු බවට ඊයේ (27) අම්පාර දිස්ත්‍රික් ලේකම් කාර්යාලයේ පැවැති සාකච්ඡාවකදී ප්‍රදේශයේ දේශපාලඥයන් සහ ආගමික නායකයන් ආරක්ෂක අංශ වලට උපදෙස් දී තිබේ.
එස්.ටී.පී.සිල්වා
http://www.lakbima.lk/index.php/2016-04-26-11-38-18/9558-%E0%B6%85%E0%B6%B8%E0%B7%8A%E0%B6%B4%E0%B7%8F%E0%B6%BB%E0%B6%A7-%E0%B6%B4%E0%B7%9C%E0%B6%BD%E0%B7%92%E0%B7%83%E0%B7%8A-%E0%B6%86%E0%B6%BB%E0%B6%9A%E0%B7%8A%E0%B7%82%E0%B7%8F%E0%B7%80-%E0%B6%AF%E0%B7%90%E0%B6%A9%E0%B7%92-%E0%B6%9A%E0%B7%99%E0%B6%BB%E0%B7%9A