July 1, 2014 at 12:59 pm | lanka C news
පසුගියදා අලූත්ගම සහ බේරුවල ඇතුළු ප‍්‍රදේශවල ඇති වූ නොසන්සුන්කාරී තත්වය පාලනය කරමින් සිංහල සහ මුස්ලිම් ජනතාව අතර සාමය නඟා සිටුවීමට කටයුතු කළ දර්ගා නගරයේ පතිරාජගොඩ විවේකාශ‍්‍රමයේ නායක හිමි බඩල්කුඹුරේ ආරියශාන්ත හිමියන්ට විශේෂ ඇගයුම් සම්මානයක් පිරි නැමීමට ශ‍්‍රී ලංකා නීතිඥ සංගමය තීරණය කර ඇත.
ශ‍්‍රී ලංකා නීතිඥ සංගමයේ සභාපති ජ්‍යෙෂ්ඨ නීතිඥ උපුල් ජයසූරිය මහතා පැවසුවේ සංගමයේ නියෝජිත පිරිසක් ගැටුම් ඇති වූ එම ප‍්‍රදේශවල සිදු කළ සංචාරයකින් අනතුරුව අනාවරණය කර ගත් තොරතුර මත බඩල්කුඹුරේ ආරියශාන්ත නායක හිමි ඇගයීමට ලක් කිරීමට තීරණය කළ බවය.
දර්ගා නගරයේ දී තරුණයන් පිරිසක් පතිරාජගොඩ විවේකාශ‍්‍රමයේ පැවති බණකට පැමිණීමෙන් සිටි හිමිනමකට පහර දුන් බව කියන සිද්ධිය මුල් කර ගෙන ගැටුමක් ඇති කිරීමට පිරිසක් කටයුතු කරමින් සිටිය දී එම තත්ත්වය පාලනය කිරීමට බඩල්කුඹුරේ ආරියශාන්ත ස්වාමීන් වහන්සේ සිංහල හා මුස්ලිම් ජනතාව කැඳවා ඔවුන් අතර සංහිඳියාවක් ඇති කිරීමට කටයුතු කර ඇත්තේ ජීවිතයට එල්ල විය හැකි තර්ජන කෙරෙහි පවා තැකීමක් නොකොට බවද ජයසූරිය මහතා සඳහන් කළේය.
July 1, 2014 at 2:33 pm | lanka C news
මුස්ලිම් ජාතිකයන් ගැන ඇති වැරදි වැටහීම් නිසා ඔවුන් සැකයට භාජන වී තිබුණද ඔවුන්ගේ ඇදහිල්ලෙන් කිසිවෙකුට අකටයුත්තක්, අසාධාරණයක් සිදු නොවන බව ශ‍්‍රී ලංකා මුස්ලිම් කවුන්සිලයේ සභාපති එන්.එම් අමින් මහතා පවසයි.
කොළඹදී පැවති උත්සව සභාවක් අමතමින් ඔහු මෙසේද කීය.
‘වසර 1200ක් පුරා සිංහල,දෙමළ,මුස්ලිම්,ක‍්‍රිස්තියානි අය සමග මුස්ලිම්වරුන් අපි සමගියෙන් ජීවත් වුණා. මේ රට අපේ මවු රට. සමාජයේ වැරදි වැටහීම් නිසා බෞද්ධ ජනතාව මුස්ලිම්වරුන් සමග තිබෙන සමීපභාවය අඩු නිසා මුස්ලිම්වරුන් අන්තවාදයට ගමන්කරනවායි,අල්ජිහාඞ්,අල්කයිදා වැනි අන්තවාදී සංවිධාන සමග ගනුදෙනු කරනවායි කියන සැකය අද සමාජගත වෙලා. ඒක වැරදි මතයක්.
එල්.ටී.ටී.ඊ සංවිධානය වගේ අප මුස්ලිම්වරුන් මේ රටෙන් කොටසක් ඉල්ලලා නැහැ. ඉල්ලන්නෙත් නැහැ. මේ ත‍්‍රස්තවාදය නිසා අදටත් මන්නාරම,මුලතිව්,යාපනය ආදී ප‍්‍රදේශවල මුල් ගම්බිම් වල ජීවත් වූ මුස්ලිම් ජනතාව කදවුරු වලට සීමාවෙලා ජීවත් වෙනවා. මේකයි මුස්ලිම්වරුන්ගේ සැබෑ තත්ත්වය’
http://lankacnews.com/sinhala/news/118334/